DR Congo: Ibitero ‘by’ubukana burenze” i Kalehe – M23
Ahavuye isanamu, Getty Images
Igihe co gusoma: iminota 2
Umutwe wa AFC/M23 urashinja igisirikare cya leta ya DR Congo kugaba ibitero “by’ubukana burenze” gikoresheje za ‘drones’ “mu duce dutuwe n’abaturage” i Lumbishi muri teritwari ya Karehe mu ntara ya Kivu y’Epfo kuri uyu wa mbere.
Ibirego bya AFC/M23 bikurikiye ibyo yatangaje ku cyumweru ko kuri uwo munsi abarwana ku ruhande rwa leta nabwo barashe ako gace ka Lumbishi, kandi bakica cyangwa bakanakomeretsa inka zirenga 50 i Rushoga muri teritwari ya Masisi muri Kivu ya Ruguru.
Muri ibyo bikorwa uruhande rwa M23 rushinja urwa leta ya Kinshasa kutubahiriza amasezerano yo guhagarika imirwano. Ibyo Kinshasa yakomeje guhakana.
Jacques Kongolo, umujyanama wa Perezida Félix Tshisekedi yabwiye BBC Gahuzamiryango kuri uyu wa mbere ko uruhande rwa leta atari rwo ruhonyora amasezerano y’agahenge.
Kongolo yagize ati: “[Nibo] Bakoresha amadrones y’u Rwanda mu kuturasa bagahita babeshya ngo ni twe twarashe”.
Mu itangazo, Lawrence Kanyuka yavuze ko ibitero byo kuri uyu wa mbere byifashishije indege za ‘drones’ za CH-4 “byangije ibintu byinshi kandi bigateza guhunga kw’abaturage benshi b’abasivile”.
Mu mezi ashize igisirikare cya leta cyatangaje ko kigomba kurengera abasivile no kwisubiza ibice bigenzurwa na M23.
Uruhande rwa M23 ruvuga ko rwiyemeje kurengera abaturage b’abasivile aho rugenzura.
Ibi birimo kuba mu gihe mu kwezi gushize i Montreux mu Busuwisi intumwa z’impande zombi zongeye kumvikana ku buryo bwo kugenzura agahenge no guhanahana imfungwa.
Credit: Source link